ជនជាតិចិនតៃវ៉ាន់ ៥២នាក់ ត្រូវបានចាប់ខ្លួននៅតួកគី រឿងដាក់បង្កប់កាមេរ៉ាសម្ងាត់ ដើម្បីលួចលេខសម្ងាត់នៅតាមទូ ATM

(តៃប៉ិ)៖ អាជ្ញាធរកោះតៃវ៉ាន់ បានប្រកាសឲ្យដឹងថាជនជាតិរបស់ខ្លួនចំនួន៥២នាក់ ត្រូវបានប៉ូលិសតួកគី ចាប់ខ្លួន និងបើកការស៊ើបអង្កេតលើករណីសង្ស័យថាពួកគេទាំងនោះ បានប្រមូលផ្តុំគ្នាជាបណ្តាញ និងដាក់បំពាក់កាមេរ៉ាសម្ងាត់នៅតាមទូ (ATM) ដើម្បីតាមដានអតិថិជនមកដកលុយ រួចក៏ធ្វើការលួចលេខ សម្ងាត់ (Passwords)​ ពីពួកគេតែម្តង។ នេះបើតាមការចេញផ្សាយ ដោយទីភ្នាក់ងារព័ត៌មានចិនស៊ិនហួរ នារសៀលថ្ងៃអង្គារ ទី៣១ ខែឧសភា ឆ្នាំ២០១៦។

យោងតាមសម្តីរបស់ប៉ូលិសតួកគី ជនជាតិចិនតៃវ៉ាន់ទាំង៥២នាក់នោះ កំពុងតែស្ថិតនៅក្រោម ការស៊ើបអង្កេត និងសួរចម្លើយនៅឡើយ ទៅលើការចោទប្រកាន់ខាងលើនេះ។ គួរបញ្ជាក់ថាជនជាតិចិនតៃវ៉ាន់ រាប់សិបនាក់ទៅហើយ ត្រូវបានអាជ្ញាធរចាប់ខ្លួនលើបទល្មើសទូរគមនាគមន៍ នៅក្នុងឆ្នាំ២០១៦នេះ នៅបណ្តាប្រទេសមួយចំនួនដូចជា ប្រទេសកេនយ៉ា និងម៉ាឡេស៊ី៕