ពុធ ១៩ តុលា, ២០១៦ ១៣:៣៧
សៀមរាប ៖ យុវជនម្នាក់បានលង់ទឹកស្លាប់ ខណៈនាំមិត្តភក្តិទៅលេង នៅទំនប់ម្កាក់ ដែលជាកន្លែងទេសចរណ៍ កំសាន្ត នៅម៉ោងប្រមាណ១៧និង៥០នាទី ថ្ងៃទី១៨ ខែតុលា ឆ្នាំ២០១៦ ស្ថិតនៅភូមិម្កាក់ ឃុំគោកធ្លកលើ ស្រុកជីក្រែង ខេត្តសៀមរាប។
លោកវរសេនីយ៍ត្រី សុខ សុទ្ធាវុធ អធិការនគរបាលស្រុកជីក្រែង បានឲ្យដឹងថា ក្មេងប្រុសដែលលង់ទឹកស្លាប់នៅចំណុចខាងលើមានឈ្មោះ វីត រ៉េត អាយុ១៨ឆ្នាំ មានទីលំនៅភូមិតាវៀន សង្កាត់សាលាកំរើក ក្រុង-ខេត្តសៀមរាប បាននាំមិត្តភិក្តទៅលេងទឹកនៅទំបន់ម្កាប់ បណ្ដាលឲ្យលង់ស្លាប់។
លោកវរសេនីយ៍ត្រី សុខ សុទ្ធាវុធ បានបន្តថា ក្រោយពេលកើតហេតុ កម្លាំងសមត្ថកិច្ចនគរបាលស្រុកបានចុះទៅកន្លែងកើតហេតុ និងបានជួយរកជនរងគ្រោះតែរកមិនឃើញអស់រយៈពេលមួយយប់ រហូតដល់វេលាម៉ោង៨៖៣០នាទីព្រឹកថ្ងៃទី១៩ ខែតុលា ឆ្នាំ២០១៦ កម្លាំងសមត្ថកិច្ចនគរបាល និងក្រុមគ្រួសារ ព្រមទាំងប្រជាពលរដ្ឋបានប្រើប្រាស់ទូកបន្តរក ក៏ប្រទះឃើញសាកសពអណ្ដែតនៅលើផ្ទៃទឹក។
បច្ចុប្បន្នសាកសព បន្ទាប់ពីសមត្ថកិច្ចនគរបាល ធ្វើកំណត់ហេតុរួចបានប្រគល់ ជូនក្រុមគ្រួសារយកទៅធ្វើបុណ្យតាមប្រពៃណី ៕
No comments:
Post a Comment