សៅរ៍ ០៦ សីហា, ២០១៦ ១៥:៣៦
រាជធានីភ្នំពេញ ៖ ចាត់ទុកថា ជាស្តាយថ្មីរបស់ប៉ុស្តិ៍លេខ៥ បាននាំមកនូវផ្ទាំងទស្សនីយភាពថ្មី ដើម្បីទាញយកការចាប់អារម្មណ៍បន្តទៀត ក្នុងការបង្ហាញនូវវេទិកាប្រគំតន្ត្រីយ៉ាងអស្ចារ្យ ដោយមានតារាចម្រៀង ល្បីពីប្រទេសថៃ គឺលោកទិកហ្ស៊ីរ៉ូ មកសម្តែងជាមួយតារាខ្មែរ គឺកញ្ញាសុខ ពិសី និងលោកខេមរៈ សិរីមន្ត ដែលមិនធ្លាប់ពីមុនមកនោះ ទើបធ្វើឱ្យបរិវេណវេទិកាប្រគំតន្ត្រីឡើងណែនពោរពេញ ទៅដោយមនុស្ស ដែលមិននឹកស្មានដល់ ។
កាលពីយប់ថ្ងៃទី០៥ សីហា លោកទិកហ្ស៊ីរ៉ូ (Tik Shiro) ដែលត្រូវគេចាត់ទុកថា ជាស្ដេចតារាចម្រៀង ប្រចាំប្រទេស ប្រមាណ៣០ឆ្នាំមក និងជាតារាសម្ដែងភាពយន្តផង បានបង្ហាញខ្លួន នៅលើឆាកប្រគំតន្ត្រី របស់ប៉ុស្ដិ៍លេខ៥ នៅជ្រោយចង្វារជាប់សាលាន័រតុន ។ នៅក្នុងឱកាសនោះ លោកបានកោតសរសើរពីសិល្បៈខ្មែរជាច្រើន ជាពិសេស គឺវិស័យចម្រៀង ដែលលោកបញ្ជាក់ថាកាន់តែមានការរីកចម្រើន ។
គ្មានអ្នកណា មិនភ្ញាក់ផ្អើលនោះទេ ចំពោះវត្តមានរបស់តារាម្ចាស់បទ «ម៉ាចយកាន់ៗ»រូបនេះ ជាពិសេសក្នុងពេលដែរ វត្តមានរបស់លោក ក៏មានតារាល្បីៗនៅកម្ពុជាគឺលោកខេមរៈ សិរីមន្ត និងកញ្ញាសុខ ពិសី ចូលរួមលើឆាកតន្ត្រីនោះផង ។
ក្នុងបទសម្ភាសន៍ ជាមួយអ្នកសារព័ត៌មាន លោកទិកហ្ស៊ីរ៉ូ បញ្ជាក់ថា លោកមកកាន់កម្ពុជាលើកទី៤ ហើយដំណើរមកច្រៀង នៅក្នុងកម្មវិធីប្រគំតន្ត្រី បន្តផ្ទាល់របស់ប៉ុស្ដិ៍លេខ៥នោះ ក៏ជាំសំណើរបស់ទូតថៃ ប្រចាំនៅកម្ពុជាផងដែរ ។
លោកថាការបង្ហាញ ខ្លួនលើកនេះ លោកមើលឃើញថា ប្រទេសកម្ពុជាមានការរីកចម្រើនយ៉ាងច្រើន ជាពិសេសគឺវិស័យ ដែលលោកកត់សម្គាល់។ ក្នុងនោះបើទោះជាវិស័យចម្រៀងខ្មែរ នៅតែមានស្ថានភាព បកប្រែចម្លងបទចម្រៀង មកពីប្រទេសជិតខាង រួមទាំងបទរបស់ថៃមិនទាន់បាត់ ក៏លោកនៅតែយល់ឃើញថា ស្ថានភាពវិស័យចម្រៀងរបស់កម្ពុជាល្អប្រសើរ។
លោកថាចំណុច ដែលមានការរីកចម្រើននោះ គឺលោកកត់សម្គាល់ថាតារាខ្មែរចាប់ផ្ដើមមានការអភិវឌ្ឍ ទាំងការស្លៀកពាក់ ស្ទីលច្រៀង ហើយអ្វីដែលសំខាន់ គឺអ្នកគាំទ្រតែម្ដងដែលមានន័យ វិស័យចម្រៀងនៅកម្ពុជា មានសន្ទុះមិនខុស ពីប្រទេសរបស់លោកនោះឡើយ។ លោកបានកោតសរសើរថា កម្ពុជាគឺជាប្រទេស ដែលមានអរិយធម៌ល្បីល្បាញ និងថាមិនពិបាកក្នុងការ ពន្លឿនវិស័យសិល្បៈ របស់ខ្លួននោះទេ ដោយសារតែកម្ពុជា មានការរីកចម្រើន លើវិស័យនោះយូរយារមកហើយ។
លោកថាធៀបនឹង៣លើកកន្លងមក សិល្បៈនៅកម្ពុជាខុសគ្នា ឆ្ងាយណាស់ ហើយលោកយល់ថាបទចម្រៀង ដែលខ្មែរនិពន្ធថ្មី ក៏មានលក្ខណៈគួរអោយសរសើរផងដែរ បើផ្អែកតាមអ្វីដែលលោកកត់សម្គាល់។
លោកទិកហ្ស៊ីរ៉ូ បានអះអាងថាលោក បានដើរកម្សាន្តនៅក្នុង ប្រទេសកម្ពុជាចំនួន២លើករួចមកហើយ ក្នុងដំណើរទាំង៤ ដែលលោកចុះមកច្រៀង និងថតស្ពតនាពេលកន្លងមក។ អ៊ីចឹងហើយទើបលោកជាប់ចិត្ត នឹងវប្បធម៌ខ្មែរ និងបានសរសើរថាខ្មែរជាប្រទេសដែលមានសំណាង ដោយសារមានសំណង់ប្រាសាទ ល្បីឈ្មោះដូចជាអង្គរវត្ត និងប្រាសាទជាច្រើនទៀត ដែលពិភពលោកទទួលស្គាល់។
លោកបានប្រកាស នឹងមានគម្រោងចុះ មកច្រៀងនៅក្នុងប្រទេសកម្ពុជា បន្តបន្ទាប់ទៀត ដោយសារតែកម្ពុជានិងថៃ ក៏ឧស្សាហ៍មានការប្រគំតន្ត្រីរួមគ្នា ហើយលោកក៏ពេញចិត្តនឹងឡើងមកច្រៀង នៅក្នុងប្រទេសកម្ពុជា ដើម្បីចែករំលែកបទពិសោធន៍ ។
ប្រភព ៖ កោះសន្តិភាព
No comments:
Post a Comment