ព័ត៌មានជាតិ » ព្រឹត្តិការណ៍សង្គម
បុរសម្នាក់នេះធ្វើឲ្យផ្អើលវត្តសំរោងអណ្ដែត
ដោយ ៖ សហការី
ថ្ងៃព្រហស្បតិ៍ ទី១២ ខែមករា ឆ្នាំ២០១៧ ម៉ោង ១៦:៥២ (12-01-2017 16:52)
រាជធានីភ្នំពេញ ៖ បុរសម្នាក់បានជិះម៉ូតូស៊េរីទំនើប១គ្រឿងទៅវត្តសំរោងអណ្ដែត ស្ថិតក្នុងភូមិច្រេស សង្កាត់ភ្នំពេញថ្មី ខណ្ឌសែនសុខ កាលពីវេលាម៉ោង៩ និង៣០នាទីព្រឹក ថ្ងៃទី១២ ខែមករា ឆ្នាំ២០១៧ ដើម្បីឲ្យលោកប្រោសព្រំ និងស្រោចទឹក ប៉ុន្តែមិនទាន់ទាំងបានស្រោចទឹកផង ស្រាប់តែបុរសម្នាក់នេះអុកឡុកផ្អើលអស់ព្រះសង្ឃ តាជី យាយជី ទៅវិញ ។
ប្រភពពីប្រជាពលរដ្ឋបានឲ្យនគរបាលប៉ុស្តិ៍ភ្នំពេញថ្មីបានឲ្យដឹងថា មុនពេលកើតហេតុបុរសខាងលើបានជិះម៉ូតូម៉ាកហុងដាឌ្រីម សេ១២៥ ស៊េរីឆ្នាំ២០១៥ ពាក់ស្លាកលេខ ភ្នំពេញ 1DB-3208 មកវត្តសំរោងអណ្ដែត បន្ទាប់មកក៏ដើរទៅកន្លែងព្រះសង្ឃប្រោសព្រំ និងស្រោចទឹក តែព្រះសង្ឃមិនទាន់បានស្រោចទឹកឲ្យផងស្រាប់តែបុរសម្នាក់នោះនិយាយតែម្នាក់ឯង ហើយអុកឡុកបង្កការភ្ញាក់ផ្អើលពេញវត្តទើបត្រូវប្រជាការពារសង្កាត់ចាប់ចងឲ្យនៅមួយកន្លែងរួចទូរស័ព្ទហៅនគរបាលប៉ុស្តិ៍ភ្នំពេញថ្មីមកទទួលយកទៅធ្វើការសាកសួរនៅប៉ុស្តិ៍ ។
នគរបាលប៉ុស្តិ៍ភ្នំពេញថ្មីបានឲ្យដឹងដែរថា នៅពេលនាំបុរសរូបនោះមកដល់ប៉ុស្តិ៍នគរបាល និងធ្វើការឆែកឆេរខ្លួនទើបដឹងថា បុរសរូបនោះឈ្មោះ ហួត សុធី អាយុ៣២ឆ្នាំ ជាអ្នកគ្រប់គ្រងម៉ាស៊ីនត្រជាក់នៅណាហ្គាវើល ស្នាក់នៅផ្ទះលេខ ៥៦ Geo2 ផ្លូវលេខ២១៨ ស្ថិតក្នុងភូមិ៨ សង្កាត់ទឹកល្អក់៣ ខណ្ឌទួលគោក ។
នគរបាលប៉ុស្តិ៍ភ្នំពេញថ្មីបញ្ជាក់ថា ក្រោយពេលធ្វើការសាកសួរគ្មានបានលទ្ធផលអ្វីនោះ សមត្ថកិច្ចបានទំនាក់ទំនងទៅក្រសួងសង្គមកិច្ចឲ្យមកទទួលយកទៅដាក់ក្នុងមណ្ឌលព្រៃស្ពឺបណ្ដោះអាសន្នសិន ចំណែកសម្ភារៈដែលជាប់នឹងខ្លួនមានទូរស័ព្ទស៊េរីទំនើប២គ្រឿង និងម៉ូតូ ត្រូវបានរក្សាទុកនៅប៉ុស្តិ៍នគរបាលរដ្ឋបាលភ្នំពេញថ្មី រង់ចាំសាច់ញាតិមកយកវិញនៅពេលក្រោយ ៕
No comments:
Post a Comment