ជិះម៉ូតូលឿន​ដល់ផ្លូវកោង មិនប្រយ័ត្ន រអិលធ្លាក់ចូលប្រឡាយ បាក់កស្លាប់

សង្គម

សុក្រ ១៦ កញ្ញា, ២០១៦ ១៤:១១

ភ្នំពេញ៖ បុរសម្នាក់ជិះម៉ូតូលឿនពេក​ ខណៈដល់ផ្លូវកោង ជាន់ហ្វ្រាំងមិនទាន់ ក៏ជ្រុលធ្លាក់ចូលប្រឡាយទឹក ទៅបុកនឹងបង្គោលថ្ម បាក់កស្លាប់ភ្លាមៗ នៅកន្លែងកើតហេតុ កាលម៉ោង ៨៖៣៥នាទីយប់ ថ្ងៃទី​១៥​ ខែកញ្ញា ឆ្នាំ២០១៦​ នៅតាមបណ្ដោយផ្លូវបេតុង​ ស្ថិតក្នុង ភូមិប្រការ សង្កាត់ដង្កោ ខណ្ឌដង្កោ​ ។

បើតាមប្រភពព័ត៌មាន ពីអ្នកនៅកន្លែងកើតហេតុ បានឲ្យដឹងថា មុនពេលកើតហេតុ គេឃើញបុរសរងគ្រោះខាងលើ ជិះម៉ូតូហុងដាឌ្រីម​ សេ១២៥ ពណ៌ខ្មៅ​ ពាក់ស្លាកលេខ ភ្នំពេញ 1BH-5659 ដោយជិះម្នាក់ឯង ក្នុងទិសដៅពីជើងទៅត្បូង​ លុះមកដល់ចំណុចកើតហេតុ ដែលជាកន្លែងផ្លូវកោង ហើយភ្លៀងផងនោះ ធ្វើឲ្យរអិលជាំន់ហ្វ្រាំមិនជាប់ ក៏ជ្រុលធ្លាក់ប្រឡាយទឹក ហើយបុកបង្គោលថ្ម បណ្ដាលឲ្យបាក់​ក​ ស្លាប់តែម្ដង ។​ ភ្លាមៗនោះក៏មាន កម្លាំងសមត្ថកិច្ចមូលដ្ឋាន ជិះល្បាតមកដល់បានលើក ចេញពីទឹកជួយធ្វើចលនា សង្គ្រោះបន្ទាន់ផងដែរ​ តែអកុសលជនរងគ្រោះ បានស្លាប់បាត់ទៅហើយ ។

មន្ត្រីនគរបាលបានឲ្យដឹងថា ជនរងគ្រោះមានឈ្មោះ នី រ័ត្ន ភេទប្រុស​ អាយុ២៧ឆ្នាំ មុខរបរ ជាងជួសជុលរថយន្ត ស្នាក់នៅភូមិថ្មី សង្កាត់ទៀន ខណ្ឌដង្កោ​ រាជធានីភ្នំពេញ ។

សូមបញ្ជាក់ថា ក្រោយកើតហេតុ សមត្ថកិច្ចមូលដ្ឋាន បានដឹកសពយកមកដំកល់ទុក នៅវត្តឬស្សីសាញ់​ ដើម្បីរងចាំប្រគល់ឲ្យសាច់ញាតិ យកទៅធ្វើបុណ្យ តាមប្រពៃណី នៅឯស្រុកកំណើត៕