ដល់ក ! ចោរប្លន់ម្នាក់ ត្រូវបានតុលាការក្រុងភ្នំពេញ កាត់ទោសឲ្យជាប់ពន្ធនាគារចំនួន៧៧ឆ្នាំ, នៅសល់៤ករណីមិនទាន់កាត់ទោស

សង្គម

សុក្រ ១៦ កញ្ញា, ២០១៦ ១៤:១០

(ភ្នំពេញ)៖ ជនជាប់ចោទម្នាក់ ជាមុខសញ្ញាប្លន់នៅតាមមូលដ្ឋាន ដែលត្រូវបានសមត្ថកិច្ច តាមចាប់ខ្លួននោះ ត្រូវបានចៅក្រមសាលាដំបូងរាជធានីភ្នំពេញ លោក ជា សុខច័ន្ទដេក ប្រធានក្រុមប្រឹក្សាជំនុំជម្រះ សម្រេចផ្តន្ទាទោសដាក់ពន្ធនាគារ រហូតទៅដល់៧៧ឆ្នាំឯណោះ។ ជនជាប់ចោទរូបនេះ ត្រូវសមត្ថកិច្ចនាំខ្លួនមកកាត់ទោស នៅសាលាដំបូងរាជធានីភ្នំពេញនាព្រឹកថ្ងៃទី១៦ ខែកញ្ញា ឆ្នាំ២០១៦នេះ ដោយកាត់ទោស លើករណីបទល្មើសប្លន់ចំនួន៤ ដែលបានប្រព្រឹត្តទៅនៅក្នុងភូមិសាស្រ្តខណ្ឌដង្កោ និងខណ្ឌចំការមន។

សម្រាប់ទោសដែលត្រូវតុលាការកាត់ទោសនាព្រឹកមិញនេះ ត្រូវបានតុលាការសម្រេចផ្តន្ទាទោសមួយករណីចំនួន៧ឆ្នាំ ដូច្នេះសរុប៤ករណី គឺស្មើនឹង២៨ឆ្នាំ។ ប៉ុន្តែជនជាប់ចោទរូបនេះ ត្រូវបានតុលាការកាត់ទោសដាក់ពន្ធនាគារ កាលពីថ្ងៃទី៦ ខែកញ្ញា ឆ្នាំ២០១៦ ចំនួន៤៧ឆ្នាំ ពាក់ព័ន្ធការប្រព្រឹត្តបទល្មើសប្លន់ចំនួន៧ដង នៅក្នុងភូមិសាស្រ្តខណ្ឌដង្កោ។ ប៉ុន្តែសម្រាប់ការកាត់ទោសជនជាប់ចោទរូបនេះ គឺនៅសល់បទល្មើសចំនួណ៤ទៀត មិនទាន់ត្រូវបានតុលាការលើកយកមកកាត់ទោស។ មន្រ្តីសាលាដំបូងរាជធានីភ្នំពេញ បានឲ្យដឹងថា ជនជាប់ចោទរូបនេះមានឈ្មោះ នុជ សំណាង ហៅសែន សំណាង អាយុ២៧ឆ្នាំ មុខរបរប្រចាំថ្ងៃរត់ម៉ូតូឌុប។

នៅក្នុងពេលសវនាការកាលពីរសៀល ថ្ងៃទី៦ ខែកញ្ញា កន្លងទៅជនជាប់ចោទបានឆ្លើយសារភាពថា ខ្លួនពិតជាបានប្លន់ចំនួន៧ករណីពិតមែន។ ប្លន់លើកទី១ នៅភូមិគោកបន្ទាយ សង្កាត់ព្រៃស ខណ្ឌដង្កោ នៅថ្ងៃទី១៣ ខែមីនា ឆ្នាំ២០១៥ជាមួយឈ្មោះធា។ ប្លន់លើកទី២ នៅសង្កាត់ព្រៃវែង ខណ្ឌដង្កោ កាលពីថ្ងៃទី២៣ ខែឧសភា ឆ្នាំ២០១៥។ ប្លន់ទី៣ នៅភូមិម័រ សង្កាត់ដង្កោ ខណ្ឌដង្កោ កាលពីថ្ងៃទី១៩ ខែកក្តដា ឆ្នាំ២០១៥។ ប្លន់លើកទី៤ នៅសង្កាត់ព្រៃស ខណ្ឌដង្កោកាលពី ថ្ងៃទី១០ ខែកញ្ញា ឆ្នាំ២០១៥។ ប្លន់លើកទី៥ នៅភូមិព្រៃស សង្កាត់ព្រៃស ខណ្ឌដង្កោ កាលពីថ្ងៃទី២៣ ខែកញ្ញា ឆ្នាំ២០១៥។ ប្លន់លើកទី៦ នៅសង្កាត់ដង្កោ ខណ្ឌដង្កោ កាលពីថ្ងៃទី២៥ ខែកញ្ញា ឆ្នាំ២០១៥ និងប្លន់ទី៧ នៅសង្កាត់កន្ទួត ខណ្ឌដង្កោ កាលពីថ្ងៃទី៣០ ខែកញ្ញា ឆ្នាំ២០១៥។ សម្រាប់ចោរប្លន់រូបនេះ​ ត្រូវបានតំណាងអយ្យការអមសាលាដំបូងរាជធានីភ្នំពេញ លោកស្រី វ៉ា សក្តា ចោទប្រកាន់ពីបទ «លួចមានស្ថានទម្ងន់ទោស»៕

ប្រភព ៖ Fresh News