អង្គារ ០៨ វិច្ឆិកា, ២០១៦ ១៥:០២
រាជធានីភ្នំពេញ ៖ ជនសង្ស័យម្នាក់ ធ្វើសកម្មភាពលួចម៉ូតូ ម៉ាកស៊ុយហ្ស៊ុយគីនិក ដែលម្ចាស់គេទុកនៅក្នុងផ្ទះ ពេលដែលកំពុងដេក លង់លក់ក្នុងដំណេក ហើយជននេះ បានយកស្លាកលេខម៉ូតូផ្សេង ទៅបិទលើស្លាកលេខម៉ូតូនោះ ដើម្បីបំភាន់ភ្នែកម្ចាស់ ដើម្បីកុំឱ្យមើលស្គាល់ ។
លុះព្រឹកឡើង ជននោះយកម៉ូតូដែលលួចបាន ទៅជិះកាត់មុខផ្ទះម្ចាស់ ម៉ូតូធ្វើប្ញកយ៉ាងសង្ហារ ស្រាប់តែម្ចាស់ម៉ូតូ ក្រឡេកឃើញសង្ស័យថា ក៏ដេញតាមឃាត់ឱ្យឈប់សុំពិនិត្យ ទើបស្គាល់ថា ជាម៉ូតូរបស់ខ្លួនដែលបាត់ ក៏ចាប់ខ្លួនជននោះប្រគល់ឱ្យនគរបាលតែម្ដង ។
ហេតុការណ៍នេះកើតឡើង កាលពីវេលាព្រឹកថ្ងៃទី៧ វិច្ឆិកា ២០១៦ ស្ថិតនៅចំណុចភ្លើងស្តុបផ្លូវលេ២៤ កែងមហាវិថីសហព័ន្ធរុស្ស៊ី ក្នុងភូមិតាងួន សង្កាត់កាកាប ខណ្ឌពោធិ៍សែនជ័យ ។
ជនសង្ស័យឈ្មោះអ៊ុំ ប៊ុនរឿង អាយុ៣៤ឆ្នាំ ស្នាក់នៅម្ដុំលូប្រាំ ក្នុងភូមិទ្រា សង្កាត់ស្ទឹងមានជ័យ ខណ្ឌមានជ័យ និងមានស្រុកកំណើតនៅឃុំព្រែកកុយ ស្រុកងមាស ខេត្តកំពង់ចាម ។
ដោយឡែក ម៉ូតូដែលជននេះលួចនោះ ម៉ាកស៊ុយហ្ស៊ុយគីនិចពណ៏ស ពាក់ស្លាកលេខភ្នំពេញ1DH- 1547ជាកម្មសិទ្ធិរបស់ឈ្មោះលាង ពៅ ភេទប្រុស អាយុ២៣ឆ្នាំ ជាជាងជួសជុលរថយន្ត ស្នាក់នៅក្នុងភូមិកើតហេតុខាងលើ ហើយត្រូវបានជននោះយកស្លាកលេខម៉ូតូផ្សេងទៀត លេខភ្នំពេញ1-FU 2252 ទៅបិទពីលើ បន្លំដើម្បីកុំឲ្យម្ចាស់គេស្គាល់ ប៉ុន្តែល្បិចខាងលើនោះ មិនអាចគេចផុតពីក្រសែភ្នែក ម្ចាស់គេបានឡើយ ។
ប្រភព ៖ កោះសន្តិភាព
No comments:
Post a Comment