អាជ្ញាធរ រាជធានីភ្នំពេញ គ្រោងអភិវឌ្ឍន៍ ផ្លូវថ្មើរជើង មួយកន្លែងទៀត ប្របតាមដងទន្លេសាប

សង្គម

សុក្រ ២៥ វិច្ឆិកា, ២០១៦ ១៤:២៥

ភ្នំពេញ៖ អាជ្ញាធររាជធានីភ្នំពេញ នឹងបន្តស្ថាបនាផ្លូវថ្មើរជើង ជំហ៊ានទី២ ប្របតាមមាត់ទន្លេសាប ដោយចាប់ពីមុខផ្សាររាត្រី ដល់គល់ស្ពានជ្រោយចង្វា ក្នុងគោលដៅបង្កើតសោភណ័ភាពថ្មីរបស់ រាជធានីភ្នំពេញ សំដៅទាក់ទាញភ្ញៀវទេសចរ។

ក្នុងឱកាសចុះត្រួតពិនិត្យ ច្រាំងទន្លេសាប ដោយផ្ទាល់នៅព្រឹកថ្ងៃទី២៥ ខែវិច្ឆិកានេះ លោក ប៉ា សុជាតិវង្ស អភិបាលរាជធានីភ្នំពេញ បានជំរុញឲ្យក្រុមការងារ ជំនាញទំាងអស់ ពន្លឿនការសិក្សា គំរូប្លង់ឲ្យបានច្បាស់លាស់ ដើម្បីឈានទៅអភិវឌ្ឍន៍ផ្លូវថ្មើជើង តាមមាត់ទន្លេសាបចាប់ពីមុខផ្សាររាត្រី ដល់គល់ស្ពាន ជ្រោយចង្វានៅឆ្នាំក្រោយនេះ។

ការពន្លឿនការស្ថាបនាផ្លូវថ្មើជើងថ្មីនេះ ខណៈដែរបច្ចុប្បន្នតំបន់ទេសចរណ៍ ចាប់ពីសួនច្បារផ្សារត្រី ដល់គល់ស្ពានជ្រោយចង្វារនេះ មានភាពរញ៉េរញ៉ៃ បរិស្ថានមិនល្អ រួមទាំងទី តំាងបំរើសេវាកម្មទេសចរណ៍ មានលក្ខណៈដាច់ដោយដុំ មិនបំរើឲ្យសាធារណៈទំាងមូល។

លោកអភិបាលរាជធានី បន្តថា ក្រុមការងារកំពុងតែសម្របសម្រួល ជាមួយអ្នករងផលប៉ៈពាល់ ជិតរួតរាល់ហើយ ដោយប្រើយុទ្ធសាស្រ្ត ឈ្នះៗទំាងអស់គ្នា ក្នុងគោលបំណង បំរើផលប្រយោជន៍សាធារណៈ ។

ការស្ថាបនាផ្លូវថ្មើរជើង ប្របតាមមាត់ទន្លេនៅតំបន់នេះ មានសារសំខាន់ណាស់ ដោយវាមិនត្រឹមតែ ការពារបានច្រាំងទន្លេ ធ្វើឲ្យមានសោភណ័ភាពស្រស់ ស្អាតប៉ុណ្ណោះទេ ប៉ុន្តែវាបានផ្តល់ផលប្រយោជន៍ ដល់ប្រជាពលរដ្ឋ បានស្រូបយកខ្យល់អាកាសដ៏ បរិសុទ្ធ និងការហាត់ប្រាណតាមមាត់ទន្លេផងដែរ។

លោកបន្តថា សម្រាប់គម្រោងផ្លូវថ្មើរជើង ចាប់ពីសួនច្បារមុខផ្សារចាស់ ប្របតាមមាត់ទន្លេសាប ដល់គល់ស្ពានជ្រោយចង្វា អាជ្ញាធរនឹងធ្វើការកែលម្អ យ៉ាងហ្មត់ចត់ ជាទីបំផុតឲ្យសក្តិសមទៅនឹង កញ្ចប់ផលិតផលទេសចរណ៍ ដ៏ទាក់ទាញនៅរាជធានីភ្នំពេញ ដែល មានភោជនីយដ្ឋាន ហាងកាហ្វេ កន្លែងលក់វត្ថុអនុស្សាវរីយ៍ និងកំពង់ផែទូកទេសចរណ៍ ហើយផ្សារភ្ជាប់ទៅនឹងតំបន់រមណីយដ្ឋានវត្តភ្នំ ដែលជាតំបន់ទេសចរណ៍ប្រវត្តិសាស្រ្ត នៃរាជ ធានីភ្នំពេញ។

សូមបញ្ជាក់ថា ការឈានទៅអភិវឌ្ឍផ្លូវថ្មើរជើង និងការស្ថាបនាច្រាំងទន្លេ ជំហ៊ានទី២នេះ ដោយចាប់ពីផ្សាររាត្រីដល់គល់ស្ពានជ្រោយចង្វា ដែលមានប្រវែង ជាង១៦៤០ម៉ែត្រ បានធ្វើឡើង បន្ទាប់ពីគម្រោងស្ថាបនាផ្លូវថ្មើរជើង និងច្រាំងទន្លេសាប ចាប់ពីបញ្ជរព័ត៌មានទេសចរណ៍ មុខព្រះបរមរាជវំាង ដល់កំពង់ចម្លងអរិយក្សត្រចប់រួចរាល់ ហើយទទួលការគាំទ្រយ៉ាងខ្លំាង ពីសំណាក់ប្រជាពលរដ្ឋទំាងក្នុងរាជធានីភ្នំពេញ និងមកពីតាមបណ្តាខេត្ត៕

ប្រភព ៖ ដើមអម្ពិល