រាជធានីភ្នំពេញ ៖ ស្ត្រីជាប្រពន្ធបានស្លាប់នៅកន្លែងកើតហេតុ និងបុរសជាប្តីស្លាប់ពេលបញ្ជូនដល់គ្លីនិកឯកជនមួយ បន្ទាប់ពីបុរសជាប្តីបានព្យាយាមជិះម៉ូតូដេញតាមចោរឆក់កាបូប ខណៈពេលជិះម៉ូតូឌុបប្រពន្ធ និងកូនប្រុសអាយុ២ឆ្នាំ ពេលដែលចោរបានឆក់កាបូបនៅមុខសាលាបឋមសិក្សាភូមិប្ញស្សី ក្នុងសង្កាត់ស្ទឹងមានជ័យ ខណ្ឌមានជ័យ ។
លុះដេញដល់មុខរោងចក្រផលិតមីម៉ាម៉ាចំការដូងក្នុងខណ្ឌដង្កោ ចម្ងាយផ្លូវប្រមាណជាង១គីឡូម៉ែត្រក៏ដេញតាមទាន់ ហើយធាក់ម៉ូតូចោរឱ្យដួល ធ្វើឱ្យម៉ូតូដែលកំពុងមានល្បឿនបានជ្រុលទៅបុកគូទរថយន្ត១គ្រឿងដួលបោកក្បាលនឹងគូទរថយន្តស្លាប់ប្រពន្ធ និងក្រោយមកស្លាប់ប្តីទៀត ដោយបន្សល់ទុកកូនប្រុសអាយុ២ឆ្នាំរងរបួសកំពុងព្យាបាល ។
នេះជាឧបទ្ទវហេតុដែលបានកើតឡើងគួរឱ្យរន្ធត់ស្មានមិនដល់ នៅមុខរោងចក្រផលិតមីម៉ាម៉ាចំការដូង តាមផ្លូវលេខ២១៧ ហៅផ្លូវចំការដូង ក្នុងភូមិសំបួរ សង្កាត់ដង្កោ ខណ្ឌដង្កោ កាលពីវេលាម៉ោង៩យប់ថ្ងៃទី២៨ មិថុនា ។ ជនរងគ្រោះដែលស្លាប់ក្នុងហេតុការណ៍ដេញតាមចោរឆក់ទាំង២នាក់ប្តីប្រពន្ធ គឺប្រពន្ធដែលស្លាប់នៅកន្លែងកើតហេតុឈ្មោះថាន់ ចាន់វតី អាយុ២៨ឆ្នាំ ជាអាជីវករ ។ រីឯបុរសជាប្តីស្លាប់ពេលបញ្ជូនទៅដល់គ្លីនិកឯកជនក្បែរកន្លែងកើតហេតុឈ្មោះ មាន ពិសី អាយុ២៩ឆ្នាំ ក៏ជាអាជីវករដែរ ស្នាក់នៅក្នុងបុរីពិភពថ្មី សង្កាត់ដង្កោ ខណ្ឌដង្កោ ។ ឯកូនប្រុសដែលបានក្លាយខ្លួនជាក្មេងកំព្រាតែ១ប៉ព្រិចភ្នែកឈ្មោះមាន ពេជ្រចរណៃ អាយុ២ឆ្នាំ ។
ចំណែកចោរឆក់ ដែលឃាត់ខ្លួនបានម្នាក់មានឈ្មោះផាន់ ម៉ន ភេទប្រុស អាយុ២៧ឆ្នាំ ជាកម្មករលីសែងនៅផ្សារនាគមាស ស្នាក់នៅផ្ទះជួលអត់លេខ ភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ ជិះម៉ូតូមួយគ្រឿងម៉ាកហុងដាឌ្រីមស៊េរីឆ្នាំ២០១៥ ពណ៌ខ្មៅ ពាក់ស្លាកលេខភ្នំពេញ ១DB១៣៣៤។
តាមប្រភពព័ត៌មានពីកន្លែងកើតហេតុបានឱ្យដឹងថា គេឃើញជនរងគ្រោះបីនាក់ប្តីប្រពន្ធនិងកូនប្រុសអាយុ២ឆ្នាំ ជិះម៉ូតូមួយគ្រឿងម៉ាក PCX ពណ៌ខៀវ ពាក់ស្លាកលេខភ្នំពេញ 1DC-5728 តាមបណ្តោយផ្លូវ២១៧ ផ្លូវចំការដូង ក្នុងល្បឿនយ៉ាងលឿនមានទិសដៅពីជើងទៅត្បូង និងបានស្រែកថាចោរៗឆក់កាបូប ព្រមទាំងជិះម៉ូតូដេញតាមចោរឆក់យ៉ាងប្រកិត ដែលជិះម៉ូតូហុងដាឌ្រីម លឿនស្លេវ ។ លុះមកដល់ចំណុចកើតហេតុមុខរោងចក្រផលិតមីម៉ាម៉ាចំការដូង ជនរងគ្រោះបានជិះម៉ូតូទៅទន្ទឹមនឹងចោរឆក់ដែលជិះម៉ូតូរត់នោះ បានលើកជើងធាក់ម៉ូតូចោរបណ្តាលឱ្យដួល ។
ចំណែកម៉ូតូជនរងគ្រោះក៏ជ្រុលល្បឿនទៅបុកគូទរថយន្តម៉ាក Morning ពណ៌ស អត់មានស្លាកលេខ ដែលកំពុងបន្ថយល្បឿនបម្រុងបត់ឆ្វេងត្រលប់ក្រោយ បណ្តាលឱ្យជនរងគ្រោះទាំងបីនាក់ប្តីប្រពន្ធ និងកូនបោកនឹងរថយន្ត ខ្ទាតបោកនឹងថ្នល់ធ្វើឱ្យស្ត្រីជាប្រពន្ធបាក់កស្លាប់ភ្លាមនៅនឹងកន្លែងកើតហេតុ។ ចំណែកបី្តបោកក្បាលនឹងកញ្ចក់រថយន្តរងរបួសធ្ងន់ធ្ងរ ហើយពេលបញ្ជូនទៅដល់គ្លីនិកក្បែរកន្លែងកើតហេតុ ក៏ស្លាប់ទៅ នៅសល់តែកូនប្រុសអាយុ២ឆ្នាំរងរបួស ស្រែកយំដោយការភិតភ័យគួរឱ្យសង្វេគបំផុត ។
ប្រភពព័ត៌មានបានបន្តទៀតថា ភ្លាមៗនោះរថយន្តដែលជនរងគ្រោះជិះបុកគូទនោះបានព្យាយាមបើករត់ចូលទៅឈប់ក្នុងបូរីឡាយគង់លើកំណាត់ផ្លូវ បេតុងលេខ៦ ភូមិម័ល សង្កាត់ដង្កោ ខណ្ឌដង្កោ ក៏ត្រូវបានប្រជាពលរដ្ឋដែលឃើញបានរាយការណ៍ប្រាប់សមត្ថកិច្ចឱ្យចុះមកអន្តរាគមន៍ ។
ក្រោយកើតហេតុជនសង្ស័យជាចោរឆក់ដែលរងរបួសត្រូវបានប្រជាពលរដ្ឋចាប់ឃាត់ខ្លួន និងស្វាគមន៍ម្នាក់មួយដៃម្នាក់មួយជើង ទើបប្រគល់ឱ្យសមត្ថកិច្ចប៉ុស្តិ៍នគរបាលរដ្ឋបាលដង្កោ នាំយកទៅទុកម្តុំ ។នៅចំពោះមុខសមត្ថកិច្ច ជនសង្ស័យបានប្រើល្បិចធ្វើជាមិនដឹងរឿងដោយចោទថា អ្នករងគ្រោះជិះម៉ូតូមកធាក់ផ្តួលម៉ូតូគាត់ តែទោះជាបែបណា ទីបំផុតបានសារភាពថា រូបគេពិតជាបានធ្វើសកម្មភាពឆក់កាបូបរបស់ស្ត្រីជាប្រពន្ធបានសម្រេចមែនគឺឆក់នៅមុខសាលាបឋមសិក្សាភូមិឬស្សី តាមផ្លូវលេខ២១៧ ស្ថិតក្នុងភូមិឬស្សី សង្កាត់ស្ទឹងមានជ័យ ខណ្ឌមានជ័យ ហើយរូបគេបានព្យាយាមបើករត់គេចខ្លួន ក៏ត្រូវជនរងគ្រោះជិះម៉ូតូដេញតាមពីក្រោយរហូតមកដល់ចំណុចកើតហេតុ ។
ដោយឡែកកាបូបរបស់ជនរងគ្រោះដែលរូបគេឆក់បានពេលដែលដួលម៉ូតូមិនដឹងថា ខ្ទាតទៅណាបាត់នោះទេ ទំនងមានចោរលួចបន្ត ។ជនសង្ស័យជាចោរឆក់រួមនិងវត្ថុតាង ត្រូវបាននគរបាលប៉ុស្តិ៍រដ្ឋបាលដង្កោធ្វើការសាកសួររួច ទើបប្រគល់បន្តឱ្យនគរបាលប៉ុស្តិ៍ស្ទឹងមានជ័យដើម្បីកសាងសំណុំរឿងបញ្ជូនទៅអធិការដ្ឋានទៅតាមនីតិវិធី ។ ដោយឡែកម៉ូតូនិងរថយន្ត នៅកន្លែងកើតហេតុសមត្ថកិច្ចជំនាញចុះធ្វើការវាស់វែងយករថយន្តនិងម៉ូតូរបស់ជនរងគ្រោះទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ ដើម្បីធ្វើការដោះស្រាយគ្នានៅពេលក្រោយ ។ ចំណែកឯសពជនរងគ្រោះទាំងពីរនាក់ប្តីប្រពន្ធត្រូវសមត្ថកិច្ចប្រគល់ទៅឱ្យសាច់ញាតិដឹកយកទៅរៀបចំធ្វើបុណ្យតាមប្រពៃណីនៅឯផ្ទះ ។
ពិតជាគួរឱ្យសង្វេគណាស់ដែលប្តី-ប្រពន្ធវ័យក្មេងបានស្លាប់ចោលកូន ព្រោះតែមានកំហឹងនឹងចោរឆក់កាបូប ។ ក្នុងរយៈពេលចុងក្រោយនេះសកម្មភាពចោរឆក់បានកម្រើកយ៉ាងខ្លាំងដែលគ្មានថ្ងៃណាគ្មានព័ត៌មានពីចោរឆក់ទេ ។ ពួកចោរទាំងនោះឆក់មិនរើសមុខឡើយ មិនថាជនរួមជាតិ ឬជនបរទេសអ្វីទេ ។
ករណីចោរឆក់ដែលធ្វើឱ្យមានការកត់សម្គាល់ប៉ុន្មានថ្ងៃមុននេះ ផ្អើលពេញបណ្តាញសង្គមនោះ គឺករណីឆក់អ្នកគ្រូបង្រៀនភាសា បណ្តាលឱ្យដួលផ្កាប់មុខរបួសក្បាលយ៉ាងធ្ងន់ធ្ងរបាននាំទៅសង្គ្រោះនៅមន្ទីរពេទ្យមិត្តភាពខ្មែរ-សូវៀត ដោយសារមានសង្ឃឹមតែ១០ភាគរយ ក្រុមគ្រួសារក៏បានរៀបចំរោងបុណ្យសពនៅឯផ្ទះ ហើយក៏បាននាំចេញពីមន្ទីរពេទ្យ ។ ដោយសារតែមិនអស់ចិត្តអ្នកគ្រូបង្រៀនភាសាចិនក៏ត្រូវបានបញ្ជូនបន្តទៅសង្គ្រោះឱ្យអស់ចិត្ត នៅមន្ទីរពេទ្យកាល់ម៉ែត រហូតមកដល់ថ្ងៃនេះកំពុងទទួលការសង្គ្រោះពីគ្រូពេទ្យនៅឡើយ គឺដួលបែកលលាដ៍ក្បាល ៕
កុមាររងគ្រោះ
រឿងហេតុពិត ធ្វើឱ្យកូនតូចបាត់ជីវិតឪពុកនិងម្តាយតែមួយភ្លែត ក្រោយដេញធាក់ម៉ូតូចោរឆក់
ឪពុករបស់កុមាររងគ្រោះដែលបានស្លាប់ 
រឿងហេតុពិត ធ្វើឱ្យកូនតូចបាត់ជីវិតឪពុកនិងម្តាយតែមួយភ្លែត ក្រោយដេញធាក់ម៉ូតូចោរឆក់
រឿងហេតុពិត ធ្វើឱ្យកូនតូចបាត់ជីវិតឪពុកនិងម្តាយតែមួយភ្លែត ក្រោយដេញធាក់ម៉ូតូចោរឆក់
រឿងហេតុពិត ធ្វើឱ្យកូនតូចបាត់ជីវិតឪពុកនិងម្តាយតែមួយភ្លែត ក្រោយដេញធាក់ម៉ូតូចោរឆក់
រឿងហេតុពិត ធ្វើឱ្យកូនតូចបាត់ជីវិតឪពុកនិងម្តាយតែមួយភ្លែត ក្រោយដេញធាក់ម៉ូតូចោរឆក់
រឿងហេតុពិត ធ្វើឱ្យកូនតូចបាត់ជីវិតឪពុកនិងម្តាយតែមួយភ្លែត ក្រោយដេញធាក់ម៉ូតូចោរឆក់
